林保賢 香港九龍城寨西南面鳥瞰照片

旁述：
你面前嘅係一幅九龍城寨嘅鳥瞰圖，由攝影師林保賢喺1980年代拍攝。

九龍城寨原來係清朝政府嘅重要軍事之地，1860年九龍半島割讓比英國，清廷一直堅持九龍城寨嘅主權，管轄權一直喺中、英之間搖擺不定，成為香港、英國、中國三不管地帶，所以九龍城寨缺乏官方規劃，從而造就咗由居民自行發展出獨有嘅密集建築群。

曾經住係九龍城寨嘅陳祥全，同我哋分享佢喺嗰度嘅童年回憶。

陳祥全：
我細個嗰陣喺東頭邨住，起初唔係喺城寨裏面住。初次接觸城寨係小學時同同學一齊去城寨探訪我嘅同學，同佢哋喺城寨玩「捉儿甄」 。第二次接觸城寨係我結婚，要搵一個蝸居，就搬咗入九龍城寨。城寨好似一個超級迷宮。因為我鍾意探索同冒險，你捉我，我追你，大家周圍躲藏，躲喺暗角中，街道穿插。

旁述：
從外圍睇九龍城寨，我哋會睇到樓同樓之間嘅密集。而從陳祥全嘅分享，可以知道內裏複雜嘅空間結構。由於佢工作同機械繪圖有關，所以佢喺城寨面臨清拆嘅時候，曾經畫低佢自己嘅城寨地圖。

陳祥全：
我覺得放喺地圖上嘅話，最主要都係一啲縱橫交錯嘅街道，樓與樓之間有天橋貫穿 。城寨中有好多類似嘅情形，人從一幢樓嘅中間穿過，去到另一幢樓。我覺得係我張地圖嘅特別之處。

旁述：
九龍城寨嘅密集結構衍生出生活裏獨有嘅人情味。

陳祥全：
經常都會聽到呢啲事。例如火警嗰陣，大家會互相提醒，因為鄰居嘅距離實在太接近，容易互相幫助。街坊福利會中，好多街坊都係夫妻檔，佢哋大多都喺九龍城寨相識，然後發展成夫妻。又例如隔離屋見到大家喺度煮飯，打開窗，同對方講：「喂，攞支豉油過嚟啊。」喺窗口交換食材，都係經常發生。

又例如捉賊。我諗喺城寨裏面做賊都好難嘅，因為被劫嘅人只係嗌一聲，就一呼百應。所以，相對來講，我有時覺得城寨嘅治安甚至比外面仲要好。除非嗰個賊好似我一樣熟悉城寨，能夠畫出城寨嘅地圖，否則佢已經係窮途末路喇。

旁述：
當你一邊望住呢幅九龍城寨嘅鳥瞰圖，一邊聽到剛才關於九龍城寨嘅故事，你會唔會諗下我哋今日嘅居住空間又點樣影響人與人之間嘅關係呢？

旁述：

香港九龍城寨西南面鳥瞰照片，係林保賢喺1989年拍攝嘅彩色橫度照片，照片喺2013年以噴墨印刷，裱喺鋁塑板上面，高91.7厘米，長120厘米。

夕陽下，從鳥瞰角度拍攝九龍城寨幾百棟擠逼嘅樓宇，毗鄰井然有序嘅公共房屋，同埋當時仍然一片荒蕪嘅賈炳達道公園。

九龍城寨佔照片中央約六成空間，城寨座落喺巿區近山邊地段，形成一個長方形，當中密集嘅樓房有高有矮，參差不一，全部都以城寨中央長方形區域為中心，向外興建。呢個長方形區域其實係以前清朝嘅衙門，佢差唔多係最矮嘅建築，被周邊幾百棟較高嘅舊樓圍繞，睇落好似一個凹咗落去嘅長方形窿窿咁。樓宇好似群聚喺一齊，緊密相連，前後左右無明顯嘅分隔。城寨外牆陳舊，樓房屋頂有尖頂、斜頂亦有平頂，雜亂無章。

城寨嘅西北面至東面，係現代化嘅公共屋邨，有五、六組樓房，每組由兩棟或三棟樓前後或左右相連，樓房有新有舊，每組有八至十二層，每層嘅窗戶開揚無遮擋，大致面向東南。

城寨嘅西面至東南面，係賈炳達道公園嘅休憩空間、硬地足球場同興建中嘅籃球場。休憩空間一片荒蕪，大片泥地中間有蜿蜒嘅路徑，彎彎曲曲，路上有零星行人往來。斜陽下，光線嚟自照片嘅左方，城寨外圍面向西南面嘅建築，以及城內參差不齊嘅樓宇高層同天台一齊迎向餘暉。夕陽映照城寨，呢啲密集嘅舊樓就好似連成一道山巒，喺公共屋邨嘅外牆投下暗淡嘅黑影。