喬佛瑞·包瓦、Edwards Reid and Begg 建築師事務所 斯里賈亞瓦德納普拉科特斯里蘭卡國會大樓（1977至1980年）切面模型

PHILIP FOWLER：
呢個係一個畢生難求嘅經歷，依加睇返，當時我並唔知道原來我係咁幸運。

旁述：
Philip Fowler同斯里蘭卡嘅著名建築師喬佛瑞・包瓦合作無間，佢哋設計咗一座全新嘅國會大樓，係由斯里蘭卡1979年新當選嘅總統委託建造嘅。大樓起喺湖中心嘅人工島上面，代表住呢個國家有意打破曾經被外國人統治嘅歷史。Philip Fowler話俾我哋知呢個建築嘅設計過程。

PHILIP FOWLER：
總統俾包瓦全權掌控呢個項目，絕對冇任何政治人物干涉。佢從島上面嘅古老皇室建築物得到靈感，尤其係位於康提嗰個設計採用咗雙層斜頂。呢種好斜嘅屋頂係成個島嘅特色嚟㗎，因為吹季候風嘅時候成日都有傾盆大雨。

旁述：
喺M+呢度，你可以睇到國會嘅橫切面模型，包括嗰個傾斜嘅屋頂。喺左手面，就係一個通風嘅主議事廳，亦都係Philip最鍾意包瓦嘅設計元素。佢而家就帶我哋去參觀一下。

PHILIP FOWLER：
包瓦對議事廳嘅設計相當精準，個佈局就好似英國下議院嘅議會咁，政府同反對派面對面，而唔係好似印度議會咁呈半圓形。公眾席就喺議事廳上面圍咗一個圈，兩側每隔一段距離就有一面銀色嘅旗幟，代表島上面唔同嘅古老地區。

議事廳整個屋頂係一個非常之靚嘅金銀色天幕，係由細塊嘅鋁片組成，再由黃銅線連埋一齊。係屋頂中央懸掛咗一盞好靚嘅大型銀色吊燈，佢嘅主題係一棵棕櫚樹──因為椰子樹同棕櫚樹喺島上最常見嘅樹木。佢俾人一種好壯觀好閃耀嘅效果，有一種豐盛嘅感覺。斯里蘭卡擁有輝煌、豐富同埋歷史悠久既文化，銀色嘅旗幟同埋吊燈，都能夠襯托出呢個國家嘅璀璨文明。

旁述：

「斯里賈亞瓦德納普拉科特斯里蘭卡國會大樓（1977至1980年）切面模型」，係2004年由喬佛瑞・包瓦同埋Edwards Reid and Begg建築師事務所，以木、銅同埋混凝土製作，高40厘米，長182厘米，闊122厘米。

呢個模型製作仔細，係一組建築群，架設喺一個灰色底板上。底板以混凝土灌注而成，係一個長型嘅多邊形，佢嘅表面有啲地方稍為高起咗，有啲就低幾級咁。底板上，有淺坑紋標示國會大樓嘅基座設計，包括外牆、支柱、門同埋內牆，室內空間劃分成超過一百間房間。

喺模型嘅上半部分，有四棟立體嘅木製建築結構。每棟結構都方方正正，有斜頂，結構之間有通道連繫。其中兩棟較矮嘅建築喺模型左上同右上方嘅邊陲位置，由上向下望，建築物嘅頂部會形成一大一小嘅正方形；而另外兩棟較大而且較高嘅建築物，就喺模型嘅中軸位置，呢兩棟建築只有一半，就好似喺中間垂直劏開咗，從切面中，可以見到國會大樓嘅內部空間設計。最高最大嘅主樓樓高五層，每層都有走廊，按照模型比例嚟睇，走廊相當寬闊。主樓內部中央有一個大廳，係一個巨型議事廳，高度貫穿三個樓層以上嘅空間，座位採用樓梯級式向中央下斜，中央天花裝有一盞吊燈，形狀似一棵樹，主幹上有密集嘅枝椏向唔同方向伸展。而主樓旁邊嘅另一棟建築物，就好似四合院咁四邊有圍牆，而中央留空，但立體模型就只係展示建築物嘅一半，由上向下望，就好似一個切走咗一半嘅正方框；從垂直嘅切面中，可見內部樓高兩層，每層走廊空間同房間間隔相若。

多邊形底板上除咗立體建築外，仲有一啲凸起或者凹陷嘅區域，佢哋都有明確嘅邊線，用嚟標記草地或馬路範圍。