岩田義治 東芝自動式電飯煲，RC-10K型

旁述：

電飯煲係一件大家都好熟悉嘅物品，樸實嘅外型入面，其實隱藏住一個相當精彩嘅故事。

M＋嘅設計及建築主策展人橫山いくこ（Ikko）話俾我哋知，好似呢樣咁日常嘅用品，往往可以反映社會嘅巨大變化。就好似喺1950年代發明嘅第一個自動電飯煲，改變咗當時好多日本婦女嘅生活，佢帶嚟嘅好處一直延續到而家。

橫山いくこ：

傳統上，煮飯對婦女嚟講，係一件好花體力同時間嘅家務，亦都係最繁重嘅工作之一。佢哋必須要一早起身煮早餐，而且仲要不斷睇住個火爐。試想像一下，佢哋每日都要重複三次，即係如果你需要用兩個鐘去做準備，咁一日就需要六個鐘，於是煮飯就變成婦女生活嘅全部。

旁述：

電飯煲除咗將婦女由煮飯呢啲咁耗費精力嘅工作解放出嚟之外，同時亦拯救咗日本飽受戰爭摧殘嘅經濟。

橫山いくこ：

呢個產品喺一個好合適嘅時候面世，亦都係社會變革嘅完美時機。當時係戰後重建，每個人都係由地獄重返人間，國家戰敗，情緒上又飽受摧殘。所以，佢哋必須要恢復經濟、搵返健康、快樂、生活同埋其他嘅意義。

因為經濟起飛，於是電飯煲造就咗一啲變化。每個人都開始變得更忙、更有效率；個個都想返工、想賺錢，冇人再願意每日花六個鐘去睇火煮飯，咁樣實在太不事生產喇。然後，婦女亦開始睇到佢哋嘅機會：佢哋想投身社會同埋擁有自己嘅職業。電飯煲對女性嚟講係一種解脫，亦都係為社會帶嚟變革嘅產物。

旁述：

電飯煲就好似一個流動嘅廚房咁，而更重要嘅係，佢經得起時間嘅考驗，呢個要歸功於佢精巧而簡單嘅設計。

橫山いくこ：

呢款產品嘅設計係非常、非常之精細。電飯煲嘅外面係乾淨嘅白色，幾乎係模仿你食飯時用嘅瓷器，好精緻嘅瓷器。佢並唔係一件典型嘅廚房用具，而係一件出得廳堂嘅電器。如果你有客人嚟，電飯煲上面有一個手柄，你可以拎佢出嚟見人。仲有就係，佢有一個黑色嘅開關掣，用一隻手指就可以操作，你只需要撳個掣落去就可以開著個飯煲。係呀，佢個設計非常之優雅。

旁述：

東芝自動式電飯煲，RC-10K型，係岩田義治設計嘅電飯煲，由東京芝浦電氣株式會社，即係而家嘅株式會社東芝喺1955年製造。材料包括金屬、塑膠同電子零件，高39.4厘米，長44.5厘米，闊37厘米。

電飯煲呈白色圓筒形，上闊下窄，機身直徑大約前臂咁長，飯煲煲蓋、把手、開關掣同煲腳等部件為銀色或黑色。

由上而下，金屬煲蓋鍍咗反光嘅銀色，附黑色膠煲蓋頭，煲蓋上窄下闊，機身連接煲蓋嘅位置，鍍上咗一圈反光銀色，有一點點鏽跡。白色機身左右兩側，附有黑色塑膠把手。機身正面正中位置印有品牌Toshiba英文字樣，下方係黑色塑膠製嘅開關，上窄下闊呈圓角梯形。開關有一個顯示燈，呈橫向長方形，燈嘅下面標註日文漢字嘅「入」字，意思係「開」；喺「入」字下面有一個下按式小型控制桿，控制桿嘅垂直軌道下面標註日文漢字嘅「切」字，意思係「關」。機身向下呈弧形微微收窄，部分位置有一撻撻發黃。電飯煲下方由三隻黑色塑膠短腳支撐。