M+大樓地下樓層一覽。攝影：梁譽聰。M+，香港
旁述：
無論你今日由邊一個入口入嚟，地下大堂好可能係你博物館之旅嘅第一站。喺香港中心地段嘅建築，難得有一個咁光猛開揚嘅空間。 你可以透過落地玻璃眺望城市風景，南面係維港，北面係九龍半島，藝術公園喺我地嘅西面，而東面就會見到西九文化區嘅其他地段。
搵到自己身處喺呢個城市嘅坐向之後，如果你係第一次參觀M+，你可能會問，博物館嘅佈局點解係咁樣嘅呢？喺地下大堂，你可以睇到打棟連繫住嘅各個樓層，從而好清晰咁搵到自己要去嘅目的地。如果你行向黑色欄桿，然後從中空嘅位置向下望，嗰度就係「潛空間」嘞。潛空間係一個專門展示大型作品嘅非傳統展覽空間。然後你再向上望就會見到二樓，即係大部分展覽廳所在嘅樓層。通過天窗更加可以睇到M+嘅幕牆。
不過，我哋先番嚟地下呢一層。呢度值得大家駐足，感受一下流通嘅空間。設計體現咗M+作為一個公共機構同共享空間嘅理念。試吓周圍望一望，你會感受到呢個開放嘅主題貫徹整座大樓。公園景觀近在咫尺，透過唔同嘅入口，你會發現你頭先經過嘅戶外空間，順住入口處嘅簷篷，喺呢度好巧妙咁轉化成半戶外空間，從而將景觀融入你依家身處嘅大堂。採光井嘅設計，亦都將室外充沛嘅自然光引入室內。你可能無為意，但只要低頭望望地下，就會發現大樓內外嘅地板都用咗相同嘅木紋混凝土，繼續將空間由室外延伸到室內。
跟住落嚟，你可以選擇更深入了解呢個樓層可以睇到嘅建築細節，亦都可以去樓上或者樓下繼續發掘博物館其他空間。