M+大樓的釉面陶瓦。攝影：鄭樂天。M+，香港
旁述：
如果話你知呢個樓層當中最顯眼嘅設計元素係源自意大利，係咪有啲出乎意料之外呢？你望吓服務櫃檯中間條方柱或者近入口嗰幅牆，表面有一排排「令面」嘅深綠色陶瓦，就係佢哋啦。當你一陣離開M+，响出面望番成座建築物，仲會見到陶瓦延綿不絕咁鋪滿整幅外牆，室內同室外空間就係咁樣互相呼應。
呢度其實鋪咗成千上萬塊釉面陶瓦。陶瓦物料係喺意大利基安蒂一間工廠以特殊黏土混合物製成，嗰區向來以豐富嘅自然黏土聞名於世。工場糅合世代積累落嚟嘅專業知識同工藝，確保陶瓦喺造模、上釉以至燒製過程中都係以最高規格完成。超過43萬塊瓦片被運到去深圳組裝成預製組件，最後抵達香港完成裝嵌。
建築事務所Herzog & de Meuron一直以來鍾情於能夠呈現物料質感、別樹一格嘅外牆嵌板設計，M+大樓亦都貫徹左呢種招牌風格。
大家不妨靠近啲睇吓啲陶瓦，從凹陷嘅位置，你會見到佢哋點樣一組組裝嵌而成。上面有啲好似古董陶瓷花樽嘅冰裂紋。波浪形嘅陶瓦模組覆蓋外牆同支柱，起起伏伏，睇起嚟好似一片竹林，墨綠色調嘅深淺程度仲會隨住唔同嘅觀看角度同光線嘅折射而改變。呢種變化萬千嘅視覺效果，令到M+嘅外牆同設計特色充滿動感，不斷同周邊環境互動，正正呼應博物館嘅願景：就係成為一個與時並進、將視覺文化緊扣生活嘅場所。
呢個遍佈建築內外嘅波浪形陶瓦嵌板，係啟發自中式傳統建築嘅琉璃瓦頂。呢種建築結構已經有兩千年歷史，今時今日都仲可以喺香港見到。整個概念建基於亞洲嘅觀點同歷史嘅參考，喺意大利山腳誕生成型，最後嚟到香港嘅海旁，帶嚟另類、摩登嘅光彩。