收聽
M+，香港，© 黃國才，圖片：M+，香港
黃國才：
我係Kacey Wong，我係一個當代視覺藝術家。我諗香港嘅觀眾通常好容易投入作品中，甚至可能會講：「咦，有間劏房喎！」
旁述：
呢間好似劏房嘅作品叫做《漂流家室》，藝術家黃國才當年創作時係想對應香港高樓價嘅情況。呢個作品係具功能性嘅建築以及雕塑藝術。
黃國才：
當我哋見到作品中大部分嘅結構都係可供使用嘅，我哋就會相信佢係真實嘅。例如佢能夠浮喺海上，門能夠關上而且鎖上，門外有門鈴、又有土地公俾人供奉。呢種疑幻似真嘅狀態，將觀眾導入我想訴說嘅故事裏。我認為呢個好重要。呢個亦係建築學嘅一部分，就係所謂Make-Believe。即使現實中充斥住諸多局限同不可能。
旁述：
黃國才本身修讀建築，後來發展成為藝術家。佢鍾意將地道嘅元素加入作品，《漂流家室》都用咗好多香港常見嘅物料。
黃國才：
建築學裏有一個用語為Vernacular architecture，意指一種由原始、原本嘅本土特色所發展出來嘅建築風格，例如大澳嘅棚屋或避風塘裏面出現嘅建築物，特別係嗰啲「駁艇」，及用發泡膠綑起製成嘅浮台……呢啲東西唔會係由建築師設計嘅，呢啲結構响尚未有建築師介入之前經已存在。呢個好有趣，好有地方特色，佢係一種從人嘅生活衍生出來嘅建築美學同功能主義。响「漂流家室」嘅創作過程中，我到訪過香港仔，考察嗰啲响避風塘嘅人點樣「駁艇」，點樣去做一艘浮船。作品中膠筒同車呔嘅出現就係源自於此。
旁述：
黃國才曾經坐住《漂流家室》漂浮喺維多利亞港之上。「海」同埋「旅程」兩個概念令作品引起唔少共鳴。
黃國才：
將船同屋放埋一齊，構成一間「船屋」。船屋含有「旅程」嘅成份，意即佢唔係一個永久嘅地點。佢可以响呢度停一陣，嗰度停一陣，表達出自由嘅意涵。佢唔係關於固定嘅地點，而係關於一趟旅程。呢點同香港人嘅集體傳統歷史有關。
旁述：
香港歷史包含唔少人口遷移嘅故事，好似難民嚟香港為求安居，又或者香港人去外國讀書、工作甚至移居。呢種「漂流無定」嘅概念係大部分香港故事嘅寫照。
旁述：
《漂流家室》係黃國才創作嘅一間住宅單位，可以喺海上面漂浮。呢段彩色有聲嘅單頻道高清數碼錄像，係由黃國才同大衞・亞塔利喺2010年合作製成，片長5分53秒，記錄咗呢個單位下水嘅情景。
影片入面，黃國才喺日頭將一間特製嘅小型流動居所《漂流家室》運到西九海濱，再放落香港維多利亞港，令到流動居所好似一艘小船咁喺海上漂浮。黃國才本人擔任船長，喺片中講解創作，並着住全套白色船長制服，一本正經咁喺海濱石堤登船出海。居所喺海上飄浮期間，船長做咗幾個活動，包括用一對船槳划船；喺船頂天窗伸出上半身，舉起雙筒望遠鏡回望岸上；着住橙黃相間嘅救生衣，企喺船頂小草地打哥爾夫球同埋釣魚；以及向岸上嘅觀眾揮手。
《漂流家室》係一間只可容納一人嘅小單位，由石屎建成，形狀如一個立方體，長闊高都係4英尺，即120厘米左右，大約到成人胸口咁高。立方體裝設喺一個方形浮台上，浮台周圍裝上黑色車軚同藍色塑膠浮桶，船尾裝有摩打。單位外牆密鋪粉紅色長條形牆磚，天花板有隻天窗，而面向船頭嗰面牆就有個窗台。窗台左邊同右邊嘅牆上，一面裝有一條垂直嘅渠管，另一面就裝有一部窗口式冷氣機。冷氣機下方有一個紅白相間嘅救生圈，喺圈嘅中間，牆身有一個正方形小門，小門可以從單位內向外往上推開，當划船用嘅船槳穿過呢道小門，船長坐喺單位入面就可以執住船槳嘅握杆划船。天台鋪咗草皮，並插有香港區旗。單位向住船尾嘅牆身有一道不鏽鋼門，旁邊有門鐘，門鐘下方近浮台嘅位置有一個紅色嘅土地神位。
單位內部嘅裝潢同一般住宅無乜分別，透過玻璃窗可以見到，單位內籠牆身係米白色，鋪上木紋地板，牆上有船長嘅照片，同埋掛咗一件救生衣，有一支魚杆挨喺牆身，窗戶裝有窗簾，窗台上放有一面鏡、一幅雙筒望遠鏡、一個迷你銅製舊式潛水頭盔模型、一支紅酒同一隻高身酒杯。