收聽
M+ 希克藏品（捐赠），香港，© 曹斐，图片：M+，香港
曹斐：
我叫曹斐，廣州出世，我嘅作品大多融合咗紀實同虛構，持續關注時代發展特別係都市化進程當中人同社會嘅轉變。
2007年，北京奧運前夕，全球整體經濟蓬勃發展，大家對未來抱有住前所未有嘅樂觀願景，呢個時候，我遇到「 第二人生」——一個虛擬社交網絡平臺，喺裏面我創建咗虛擬化身「中國・翠西」，通過佢，我遊歷咗大半個虛擬世界，領略咗紐約時代廣場、 巴黎埃菲爾鐵塔、威尼斯、阿姆斯特丹等等地方，但發現幾乎無一個地方係來自「中國」，所以我就想喺呢個數位世界創造一個具有活力嘅中國當代都市。
《人民城寨》就好似一幅電子嘅中國山水畫長卷，充滿咗高度濃縮嘅中國當代城市嘅各種符號，比如倒掛嘅CCTV上海東方明珠電視塔、巨大嘅單車輪喺人民紀念碑上旋轉，中銀大廈、水庫大壩，仲有爛尾樓、工地、城中村，仲有香港密集嘅高樓大廈填海公寓，港口嘅貨櫃，仲有漂浮嘅購物中心，都混雜响呢個空間裏面。
旁述：
為咗資助呢個項目，曹斐將《人民城寨》嘅虛擬空間賣咗俾藝術機構作為虛擬畫廊使用。佢仲邀請咗好多人——包括收藏家、藝術家同詩人，以及學校同藝術雙年展，去參加《人民城寨》嘅發展。佢甚至為《人民城寨》設立咗一個市長辦公室；M+藏品嘅捐贈人烏利・希克就係第一任市長，佢仲喺《人民城寨》嘅大會堂發表咗就職演講。正如曹斐所講，呢個係一個同現實截然不同嘅世界。
曹斐：
《人民城寨》係一個响虛擬世界裏面嘅城市，佢無空氣，無灰塵，無現實嘅衝突同矛盾，就算佢同現實嘅關係係平行嘅，但佢依然係一個無風險嘅世界。
旁述：
呢件作品嘅名稱係《人民城寨》，係曹斐喺多人線上遊戲《第二人生》創建嘅虛擬大都會，創作時間橫跨2007至2012年。喺2021年開幕嘅「物件・空間・互動」展覽，就展示M+藏品當中所有同呢件作品相關嘅文獻檔案，包括：觀眾可以用嚟探索《人民城寨》嘅多媒體裝置、十五段單頻道數碼錄像、噴墨打印紙本、電腦遊戲檔案、網站、地盤頭盔、泥鏟、檯、不鏽鋼標誌、布旗、投影同出版刊物。上述文獻檔案，係喺一個四邊形嘅展區展示，牆身係灰黑色，地面鋪上紅色地氈。
喺展區左半邊嘅中央位置、近出入口嘅地面，有一個《人民城寨》標誌嘅投影，係英文「RMB City」嘅字樣。標誌後方，有一張銀灰色不鏽鋼檯，檯嘅外形係立體大楷英文字「RMB」，檯面放咗一部桌上型電腦，螢幕開住喺《第二人生》建立嘅《人民城寨》。展區後面、面向出入口嘅牆上，有巨型錄像投影。投影嘅隔離就係展區左邊嘅牆，牆上掛有一面白色嘅旗，旗上印有紅色嘅《人民城寨》標誌。旗嘅旁邊係動土儀式常見嘅白色塑膠頭盔，同埋白色不鏽鋼泥鏟。
至於展區右半邊，中央有一個黑色支架，差唔多佔去右面展區全部空間。支架嘅形狀好似一道旋轉門，由中軸向外展開三隻翼，每隻翼嘅兩面都掛咗一部平面電視，電視前方有黑色三角形長凳。喺面向出入口嘅牆邊，靠右設置咗一列長檯，檯面係透明玻璃，放咗四部平板電腦；而平板電腦下面嘅透明展櫃，就展示咗幾本刊物。長檯隔離係展區右邊嘅牆，牆上展示咗裝有作品相關圖片嘅文件夾，以及裱喺鋁塑板嘅《人民城寨》彩色螢幕截圖。而喺出入口，牆身右邊展示咗《人民城寨》由2007年6月至2011年期間嘅大事年表。
喺展區入面嘅投影、電視同平板電腦，播放住唔同嘅單頻道錄像，大部分係《人民城寨》喺線上遊戲入面嘅3D電腦影像。喺影像中，《人民城寨》係汪洋大海中嘅一個島，島上面起滿著名嘅建築，包括用金磚砌成嘅中銀大廈、傾斜嘅上海東方明珠塔、着住綠燈嘅澳門新葡京酒店、掛住大熊貓頭像嘅北京天安門等等。天安門由巨型支柱支撐到半空，佢嘅後方不斷排水，好似長江三峽大壩排洪咁，啲水一直流落去遠處嘅巨型馬桶，馬桶旁邊係貨櫃碼頭。而天安門前面係一個大浴場，連接兩條扶手電梯上去北京人民英雄紀念碑，碑上面有一個不停轉動嘅巨型單車車轆。
除咗大型建築，島上仲有不斷噴火嘅工廠煙囪、掛有標語嘅工地、密集嘅小屋同埋寨城小巷。由小巷穿過牌坊內進，有唔同攤檔、足浴按摩店等等，巷內石柱有曾灶財嘅書法。岸邊有一個俗稱「鳥巢」嘅北京國家體育館，浸咗喺海入面，「鳥巢」生鏽嘅支架裏面係田徑跑道同大富翁棋盤。「鳥巢」上方係紐約古根漢博物館，附近有四塊面向大海嘅大型招牌，招牌紅底白字，以簡體字寫住「和諧社會」嘅標語。
海上有綠色迷彩坦克車、正在沉沒嘅貨輪、一尊載浮載沉嘅毛澤東像、一尊紅衛兵石雕、一架巨型超市購物車，裏面裝住幾棟高樓大廈同埋一尊觀音像。
《人民城寨》上空亦懸浮住唔同嘅物件：有用吊臂吊住嘅北京中央電視台總部大樓；有一隻巨型大熊貓；有四粒黃色星星吊起一面紅旗，紅旗打平咁喺空中飄揚，旗嘅正中間托住另一粒黃星。
《人民城寨》入面會出現各式虛擬化身，由《第二人生》嘅玩家操控，例如藝術家本人曹斐嘅虛擬化身就叫做中國．翠西，係一個年青女子，佢將頭髮紮成雙髮髻，髮髻下有長馬尾；佢嘅身形修長，全身包住鐵甲，而且識得喺天上飛。
其他虛擬化身嘅外形同服飾千變萬化，除咗人類，仲有動物同機械人，又或者係兩者嘅混合體。常見嘅人物包括：馬克思、眉心長有女性陰部嘅老子、下巴粒痣變咗軍綠色嘅毛澤東、着住西裝嘅雷曼兄弟主管等等。其中一段錄像有個識得爬嘅BB，叫中國．山，佢含住奶嘴，着尿片，會叫中國．翠西做媽媽。
（以下為語音口述影像以外嘅延伸描述。）
《人民城寨》文獻檔案之中有十五段單頻道數碼錄像，部分有英文或日文配音，部分無聲，只以字幕形式顯示對話。喺2021年開幕嘅「物件・空間・互動」展覽中，有七段錄像喺投影同平面電視展示，其餘八段喺平板電腦展示。
以下係喺投影同電視展示嘅七段錄像扼要描述。
《第二人生》虛擬電影《人民城寨︰第二人生城市計劃》，片長5分57秒，係線上遊戲嘅3D電腦影像。鏡頭遊走《人民城寨》嘅唔同角落，展示日夜景觀。
《第二人生》虛擬電影《人民城寨︰人間煉獄》，片長18分05秒，係線上遊戲嘅3D電腦影像，分為十一個段落，主要以毛澤東、馬克思、老子同雷曼兄弟主管四個人為中心人物，拍攝佢哋喺不同場景嘅對話同活動。場景包括：馬克思拜祭雷曼兄弟之墓、燒烤爐自動將活雞逐步製成燒雞，以及上述四人身處北京國家體育館「鳥巢」、玩大富翁嘅機會咭同懲罰咭時嘅情況等等。
《第二人生》虛擬電影《人民城寨的生活》，片長24分50秒，喺「物件 · 空間 · 互動」展覽，就節錄咗其中22分56秒嘅片段嚟展示。電影係線上遊戲嘅3D電腦影像，主要以中國．翠西同佢個囝中國．山為中心人物，拍攝佢哋喺唔同場景嘅情況，記錄兩個人之間嘅對話，或者佢哋同其他人嘅對話。其中一幕發生喺變成牛角形狀嘅古根海姆博物館，而另一幕描述新巿長喺天安門廣場發言。
《第二人生》虛擬電影《人民城寨︰智力馬拉松》，片長14分47秒，係線上遊戲嘅3D電腦影像，主要拍攝中國．翠西、策展人漢斯・烏爾里希・奧布里斯特、毛澤東、馬克思同老子五個人喺不同場景嘅對話同活動。場景包括：佢哋各自企喺一架用英文報紙摺成嘅巨型紙飛機上，喺空中飛翔；另外會喺北京中央電視台總部大樓嘅天台，舞動啦啦球同埋玩花式溜冰；又或者會喺北京人民英雄紀念碑下面扯大纜，由中國・翠西聯同策展人漢斯・烏爾里希・奧布里斯特迎戰毛澤東同馬克思，並由老子擔任裁判等等。
《第二人生》虛擬電影《人民城寨的誕生》，片長10分32秒，係線上遊戲嘅3D電腦影像，展示《人民城寨》嘅建築過程。一個工程師懸浮喺空中，建築物嘅構成部件逐一出現，或者先出現白色嘅外形再上色，就好似工程師正喺度組裝同設計構件。鏡頭喺建成後嘅《人民城寨》中遊走，然後逐漸拉遠，影像縮細，構成部件逐個消失，最後只剩大海中一個綠色島嶼。
《人民城寨樣板戲》，片長45分54秒，喺「物件 · 空間 · 互動」展覽，就節錄咗其中4分49秒嘅片段嚟展示。影片係一個真人舞台演出嘅錄像。舞台後方有巨型投影，展示《人民城寨》裏面虛擬化身之間嘅互動；而舞台上，一男一女嘅演員喺投影幕前表演，回應投影出現嘅片段。其中一幕，投影上嘅虛擬化身着住超人衫跳舞，兩位演員就着住日常服裝，模仿虛擬化身嘅動作舞動。
《人民城寨︰神人暢》，片長11分02秒，係電腦遊戲嘅畫面，展示一個僧侶嘅背影，佢喺海上踩緊滑浪板，有一個個地標建築、品牌標誌向佢漂過嚟，或者從天而降。僧侶左右移動、跳起、避開或者撞上去，有時會獲得分數。最後僧侶會由仙鶴帶到《人民城寨》。