收聽
![沙發以金屬、漆、棉和羊毛製造。兩疊色彩繽紛的軟墊平放在金屬網底座上,形成沙發的下半部分。至於作為椅座和靠背的兩塊軟墊,其墊套上則滿佈花紋圖案。多條金屬杆從底座向上延伸並朝外彎曲,形成椅背和扶手的結構,並以布料包裹起來。](https://res.cloudinary.com/mplustms/image/upload/v1627819101/v2/prod/small/009001_009500/009102_013.jpg)
M+,香港,東京造形大學捐贈,2018年,© Estate of Ohashi Teruaki,圖片:M+,香港
旁述:
第一眼見到呢張顏色鮮艷嘅長凳,你可能會認為佢係嚟自童話故事。佢嘅多層圖案坐墊同埋搶眼嘅框架,可能會令你諗起《豌豆公主》嘅故事。坐喺一件咁奢華嘅傢俬上面,到底舒唔舒服嘅呢?
呢件係日本設計師大橋晃朗喺1980年代中期嘅作品。佢喺日本建築界以外並唔係咁多人認識,佢喺進入傢俬設計行業之前,其實係一位建築師。喺佢短暫嘅一生之中,從未喺商業上有大規模生產嘅作品;相反,佢選擇直接同建築師合作,為特定嘅房屋或者空間度身訂造傢俬。
呢件作品叫《Hannan長椅》,係為著名建築師長谷川逸子設計嘅房屋製作。長谷川逸子同我哋分享佢對呢件作品同埋大橋晃朗創作嘅睇法。
長谷川逸子:
當我加入篠原一男建築研究小組個陣,大橋先生就剛剛離開。我有機會睇到一啲佢畫嘅建築藍圖。佢用好幼好淡嘅鉛筆畫出好靚嘅手稿,令我有好深嘅印象。自此我哋成日傾關於傢俬同埋房屋嘅嘢,有時我會請佢為我設計嘅小屋創作傢俬。
1984年,當我完成自己間「NC House」個陣,我就好想用大橋先生設計嘅傢俬去創造一個室內空間。由於果間屋嘅設計只用咗簡潔嘅水泥牆,於是我就將《Hannan長椅》放喺嗰度,令人有明亮而休閒嘅感覺。我並冇期望張凳可以令人坐得舒服同埋放鬆;我認為大橋先生嘅傢俬,主要功能係要令空間更有活力、帶來隨意同埋愉悅嘅感覺。
大橋先生係一個非常安靜嘅人。喺嗰段日子,佢專注思考關於傢俬嘅事。喺開始造呢件作品嘅時候,佢創作咗一啲令我哋相當驚喜好玩嘅設計,佢稱之為「遊戲作品」,我哋都難以置信呢啲作品出自一個咁嚴肅嘅人之手。
旁述:
將傢俬視為「遊戲作品」,係咪一個好有趣嘅概念呢?如果你可以搬動呢張凳,你又會將佢放喺邊度呢?
旁述:
呢件作品嘅名稱係《Hannan長椅》,係大橋晃朗喺1984年設計嘅梳化,由株式會社井上工業同Viale喺1986年製造,物料包括上咗油漆嘅金屬、棉同羊毛。呢張闊身兩座位梳化高84厘米,長247厘米,深107厘米。
呢張梳化嘅外形由一個銀色金屬支架塑造,靠背向外彎曲,掹上唔同顏色嘅彈性布,背墊同座墊就配上唔同圖案同條紋嘅花布,成張梳化睇起嚟色彩繽紛。
梳化嘅支架外露,露出大約半吋粗嘅銀色金屬管。金屬底座係帶細圓孔嘅金屬網板,大約有腳踭咁高,形狀似一個橢圓形,但4點到8點鐘嘅位置就被打橫切走。沿住橢圓底座嘅弧形,設有十五支金屬管,向上延伸到成年人及腰嘅高度,再各自向外彎曲至半圓形,有如花瓣向外彎。當中4點同8點鐘位置兩端嘅金屬管特別長,向外屈至半圓形後,繼續向內螺旋收細再屈一圈,形成梳化嘅扶手,形狀就好似綿羊頭上兩隻內彎嘅角,而向外屈嘅半圓形直徑同座位嘅深度相若。喺向上延伸嘅金屬管之間,焊接咗三支橫向嘅金屬管,用嚟固定整個支架嘅結構。
梳化嘅座位由六層座墊鋪疊而成,由底數上去,除咗第四層同最面嘅第六層,其餘四層都係由左右兩塊座墊組成。座墊都係淨色,有藍色、紅色、橙色、淺藍色、粉紅色等等。正面望向梳化,第四層係打橫一行四十個脹卜卜嘅白色布球,第五層中間位置有八個紫色布球。梳化嘅背墊同第六層、即係最面嗰層嘅座墊,就用上印尼嘅蠟染(batik),染成以啡色為主色調嘅花布,底色同花紋有深淺對比,底色係米白色或泥黃色,花紋係深啡色,以花同攀藤植物為主,再重複配上菱形、三角形之類嘅幾何圖案。梳化靠背支架彎曲嘅部分,掹咗粉色色調嘅拼布,有粉紅色、粉藍色、淡黃色同蘋果綠等等。